長崎 2日1夜 bandgal 急行

第一日黃昏跟大隊到著福岡，第二朝就開始今次的bandgal 急行旅行團。

福岡去長崎坐かもめ5號，全程兩個鐘多D (0717 – 0926)。由於時間太早，上車食完飯團就直接訓到長崎站。 落車的月台就有福山雅治的歌叫醒你， 加送出道咁多年福山的CD cover + 歌詞！

第一個景點係長崎平和公園 平和祈念像。果然係必到景點，好多旅行團，陸客多到呢。。。

第二個重點企鵝館 （長崎ペンギン水族館 ）！

30分鐘的巴士車程，離開旅遊區，被大學和住宅區包圍，來到隱世企鵝館。 全館有9 個唔同品種的企鵝， 比起香港海洋公園的3種（國王、 跳岩、巴布亞）多， 有6 種係第一次見面呢。

真正可以近距離的見到企鵝們。。。 記住留意佢地遊行(?) 時間， 可以更近距離見到佢地呀。 除左室內的部份，仲有一個圍起的沙灘俾子民們出去曬陽光，接觸下真的沙灘海水。 有夠貼心。。。

下一個景點就係 Drum Be 7！ 原來就係眼鏡橋附近。。。 大家未入場前都去左眼鏡橋附近坐下食下雪糕。  當然準時開場， 唱左差唔多2 個半鐘， 算係交足貨了。

第二日又係另一個重點 － 軍艦島！ 記得出發前上網留位俾左錢先， 因為d trip 都好快滿！ 有幾間船公司搞呢類上島活動， 同一個碼頭都有幾架船出發。

船就無乜特別，上層係有頂開放式， 夏天的時候吹海風都真係好舒服， 冬天的話就要諗下食唔食到成個鐘頭海風了。 要抓緊影相機會的朋友， 記住早D去排隊上船坐返個靚位了。

近一個鐘的船程後， 登島前都會係島的外圍左左右右行兩個圈， 滿足大家的影相需要。 上島後， 開放俾公眾的地方真係一個角落咁大把， 應該400-500 米左右的距離由碼頭行到其中一個角落。一切安全至上， 職員沿途解釋每一樣野， 唔驚聽唔明日文， 因為佢地有一個folder 俾外人， 介紹返佢地講的內容。船公司仲有一位員工係香港人， 如果怕悶記住找出呢位香港朋友同你傾下計了。

上島後唔可以開遮， 怕曬的朋友記住帶帽啦。 靚靚的朋友，高跟鞋其實無問題，因為全程石屎路。。。

軍艦島船程後， 直接回長崎站再火車回福岡，睇埋第二場 Plastic Tree 了。