屋久島四日行 － 第一日

講左好幾年， 終於屋久島上陸！

屋久島上陸可以揀坐內陸機 或 坐船， 香港出發的話，最近都算係直飛九洲的鹿児島或博多。

鹿児島來往屋久島，指宿和鐘子島的船 － https://www.tykousoku.jp/，去屋久島的話，每日約有5-6 班， 唔同季節會有改動，建議出發前先預約好。（ 單程： 8,800YEN， 雙程： 16,100YEN）

坐飛機的話， JAL 的內陸機會幫到你。鹿児島出發的話，每日有3-4 班機。 福岡的話，每日只有1 班機， 而天氣因素每日不同， 隨時天氣太差而取消航班或轉飛另一個城市。 坐飛機的朋友都係做好 Plan B 的準備。

上島的目標有兩個： 繩文杉 + 白谷雲水峽。  當然唔想用腦就找個響導帶你行山， 島上唔少響導係會大團小團的帶住行，識英文的都唔少。剛好住的民宿主人 Kuma San 係島上名人，曾經拍過唔少本地及外國電視節目， 完全係唔小心搵到正野。

第一次去，上島4日，其實唔係好夠呢，唔計景點，仲有環島遊都未遊埋！

第一日：

早上由福岡機場出發， checkin 的時候地勤姐姐仲神色凝重咁同我地講天氣好差，可能降落唔到屋久島。。。 果一刻真係個心離一離喎。。。 即刻search 下鹿児島的船最後一班係幾點，然後鹿児島機場去碼頭有幾遠。。。 搞一輪又上機， 都係懷住上左機再算的心情， 話咁快又飛到， 好在係降落屋久島，果然唔使諗咁多，話到就到呀！

出發前先上網租車， 揀好車，俾埋到達班機詳程，  租車公司仲有叔叔係機場接機。拿到車後，就由東面的機場開車去南面的民宿。 （後來發覺春虫虫左， 因為民宿其實包埋接送，真係租車錢都可以慳返呀！） 車程大約半個鐘， 環島的公路都係超舒服。

到達民宿後， Kuma San 就車我地去附近的溫泉， 瀑布觀光。天氣嘛嘛地， 雨係無停過， 露天風呂，海中溫泉都只能行過睇下，無得浸呢。

等齊人好快就食晚飯， Kuma San 仲專登拎個英文節目俾我地睇，原來係幾年前佢幫外國電視台拍手攝屋久島的特輯！

by